Thursday, November 28, 2013

የኢቲቪ ተረት ተረት

የኢቲቪ ተረት ተረት

ኢቲቪ በዛሬው ዜናው ‹‹አንድ በባህርዳር ከተማ የሚኖር ወጣት ከጎዳና ተዳዳሪነት 7 ሚሊዮን ብር ባለሃብት ሆነ፡፡›› ሲል ተከታተልኩ፡፡ ኢቲቪ ሁሌም ያስቃል፡፡ አንዳንዴ ደግሞ በጣም ያስቃል፡፡ ያው እንደ ውሸቱ ልክ ነው፡፡

ይህ ወጣት በ1998 አካባቢ የጎዳና ተዳዳሪ ነበር፡፡ በቃሉ ‹‹እንዳመነውም›› ከአራት ሺህ ብር በላይ ነበረው፡፡ እንዴት ነው ነገሩ የመንግስት ሰራተኞች የአራት ወር ደሞዝ (ብድር ሊሆን ይችላል) ተቀማጭ ይዞ ‹‹የጎዳና ተዳዳሪ››? ይህም ይሁን ብለን እንቀበል፡፡ ...
በሰባት አመት ውስጥ ያች 4 ሺህ ብር ሰባት ሚሊዮን ብር በላይ ሆነች፡፡ ሰውየው ከዚህ ብር ለመድረስ በየ አመቱ አንድ ሚሊዮን ብር ሊያተርፍ ይገባዋል፡፡ ወጩ እንዳለ ሆኖ ነው፡፡ ሌላ 7 ሚሊዮን በሉልኝ! እንደ ‹‹ልማታዊ መንግስቱ›› እድገት አቆጣጠርጎዳና ላይ የነበረው ወጣት 8 ሺህ ሲደርስ 100 ፐርሰንት ይባላል፡፡ 16 ሲሆን ደግሞ 200 ፐርሰንት….. እያለ እስከ አንድ ሚሊዮን ይደርሳል፡፡ 7 ሚሊዮን፣ 14 ሚሊዮን…፡፡ ለካስ ከ11.2 በመቶ በላይም እድገት አለ! በሺህና ሚሊዮን ፐርሰንት!
4 ሺህ ብር በአመት አንድ ሚሊዮን ሲያተርፍ የባህርዳሩ ወጣት የመጀመሪያው መሆኑ ነው፡፡ ዜናውን በማስተላለፍ ደግሞ ኢቲቪ! እኛም ፈርዶብን ሰማነው፡፡ ይህ እድገት ምንም አይነት ጤናማ ኢኮኖሚያዊ ትንታኔ አይሰጥበትም፡፡ እኛማ ሰማነው ምን አልባትም ነጻ ሚዲያ፣ ፕሮፖጋንዳ መር ሳይሆን በኢኮኖሚ ቀመር የሚመራ ኢኮኖሚ የሚኖረው ቀጣይ ትውልድ (ጊዜውን አልጠቀስኩም) ይህን ዜና ብንነግረው ከተረት ተረት ውጭ በሚዲያ ተቋም የተላለፈ ነው ብሎ አያምነንም፡፡

አዎ ይህ እውነት ሊሆን አይችልም፡፡ ተረት ተረት ነው፡፡ ፕሮፖጋንዳ! በእርግጥም እውነት ሊሆንም ይችላል፡፡ ሙስና፣ዘረፋ፣ ስርቆት! ብሎም ነጭ ፕሮፖጋንዳና ውሸት!